У Беларусі ўвялі забарону для фізічных асоб на ўвоз, захоўванне, абарот, эксплуатацыю і выраб беспілотнікаў

Кіраўнік дзяржавы Аляксандр Лукашэнка падпісаў Указ нумар 297 "Аб дзяржаўным уліку і эксплуатацыі грамадзянскіх беспілотных лятальных апаратаў", які накіраваны на забеспячэнне грамадскай бяспекі і рэгуляванне парадку дзяржаўнага ўліку грамадзянскіх беспілотных лятальных апаратаў і авіямадэлей, а таксама іх выкарыстання.
Згодна з указам, увоз, захоўванне, абарот, эксплуатацыя і выраб грамадзянскіх беспілотных лятальных апаратаў дазволены толькі арганізацыям і індывідуальным прадпрымальнікам у сувязі з іх прадпрымальніцкай і прафесійнай дзейнасцю ў адпаведнасці з патрабаваннямі, устаноўленымі ўказам.
Для ўвозу грамадзянскіх беспілотных лятальных апаратаў арганізацыямі і індывідуальнымі прадпрымальнікамі неабходна атрымаць дазвол ад Дэпартамента па авіяцыі Міністэрства транспарту і камунікацый, які будзе ажыццяўляць улік такіх апаратаў, якія ёсць у арганізацый і індывідуальных прадпрымальнікаў.
Указ таксама прадугледжвае стварэнне аўтаматызаванай інфармацыйнай сістэмы дзяржаўнага ўліку грамадзянскіх беспілотных лятальных апаратаў, якія належаць юрыдычным асобам і/ці індывідуальным прадпрымальнікам.
Дакумент забараняе фізічным асобам увоз, захоўванне, абарот, эксплуатацыю і выраб грамадзянскіх беспілотных лятальных апаратаў.
Указ уступае ў сілу пасля яго афіцыйнага апублікавання ў частцы ўвозу, эксплуатацыі і вырабу апаратаў фізічнымі асобамі. У частцы захоўвання і абароту Указ уступае ў сілу праз шэсць месяцаў.
На працягу шасці месяцаў пасля афіцыйнага апублікавання Указа, фізічныя асобы могуць перадаць наяўныя ў іх беспілотныя лятальныя апараты арганізацыям або індывідуальным прадпрымальнікам або перадаць іх на захоўванне ва ўпаўнаважаную арганізацыю, вызначаную Урадам.